用雙語冊推sak多語言教育的實踐

用雙語冊推sak多語言教育的實踐 張學謙 「你若用in聽有ê語言講話，in會聽入去頭殼內。若用in ê母語講予in聽，遐ê話會透kah心肝內底。」 ---曼德拉 台南市政府真有行動力，除了設立言論自由日，閣提出母語教育加一節的構想，che攏是值得呵咾ê做法。一個偉大的城市通重要的，著是自由的空氣，予各種無仝的思想通好佇遐交流、論辯佮對話，思想的多元化是維持民主進步的基礎。這嘛包括母語使用的自由佮母語教育人權的保障。國際的語言教育文獻攏強調語是資產，嘛是權利。 言論自由這馬已經成做共識，母語是資源，嘛是人權的觀點著較無得著夠額的推sak。增加母語節數，雖然有重要的教育意義，煞有人誤會講是意識型態作祟，講會「增加孩子壓力，並讓台南市教育水準「倒退嚕」，這款講法毋但打壓母語人權，閣否認母語是重要的教育資產，實在講，袂堪得雙語教育理論ê檢驗，嘛違背世界多語言教育的趨勢。 因為母語受踳踏造成的母語傷痕，過去捌hông當做是「身為台灣人的悲哀」。這馬，台灣有簽署「公民與政治權利國際公約」，這個公約變做台灣愛遵守的法律。公約的第27條有保障人民的語言人權，主張「凡有種族、宗教或語言少數團體之國家，屬於此類少數團體之人，與團體中其他分子共同享受其固有文化、信奉躬行其固有宗教或使用其固有語言之權利，不得剝奪之。」照按呢來看，反對母語教育，敢毋是剝削母語教育權，違反這個保障族群語言權利的條文？ 當然反對母語教育的人，無一定有心欲剝削母語人權，in有可能是質疑母語的教育價值抑是母語教育的可行性。這2點聯合國教科文組織(UNESCO，教科文組織）佇1951年著提出回應啊，佇1953年出版的報告書《本國語佇教育中的使用》著明確ê指出學校應該用囡仔ê母語作教學語言： 「母語是教育兒童最好ê媒介是公認ê道理。心理上，母語是兒童自然而然就ē-tàng表達kah理解ê有意義ê符號。社會上，母語是兒童認同伊所屬社群成員ê一種方法。教育上，兒童以母語學習比用無熟悉ê語言khah緊。」 教科文組織m̄-nā建議初期ê教育需要使用母語，koh建議母語tī教育體制ê使用應該盡量向後延伸。教科文組織佇2003年提出《多語並存世界的教育》閣再強調母語教育佮雙語教育的必要性。世界有名的語言教育學家Garcia講：「二十一世紀教育囡仔的唯一方式，著是雙語教育。所有個囡仔不管啥物語言背景攏需要發展雙語抑是多語能力，才有法度應付二十一世紀的溝通挑戰。」母語教育成做雙語教育的核心，無教thah會使得！ 針對母語優先的雙語教育發展趨勢，語言教育界嘛開始反省單語教學原則。越來越濟的語言教育學者注意著單語教學的欠缺，Cummins就批評講，單語教學原則毋但無實證研究的支持，嘛無合咱人學習的原理，閣較無符合現代對雙語、多語人心智運作的理解。Cummins主張採取雙語教學策略：「對完全倚靠單語教學方法中敨放出來，咱著會得著濟濟的語言教學機會，透過雙語教學策略，承認雙向語言轉移的現實，會當積極的促進學習轉移。」 母語優先的雙語教育閣有濟濟的好處。咱會當對語言多樣性的優點來看，雙語教育的必要性。Joshua A. Fishman（1982）講：「世界需要族群語言多樣性，才會當達到自我救贖、koh-khah有創造力，koh-khah會當確保人類問題的解決，佇物質主義橫行之下，有法度繼續人性化，嘛是為著培養人類koh-khah豐富的美學、智識kah情感的能力，會當講是為著達到人類koh-khah高的境界。」 實施母語雙語教育定定會tú著一寡實際ê限制，親像：1)欠缺教科書kah其他ê教材；2)欠缺一般ê閱讀資料；3)欠缺受過訓練ê老師；4)語詞無夠。教科文組織提出ê解決方式真a-sa-li,就是：「欠啥補啥」ê原則。干焦驚無心去推sak母語教育，若有心啥物問題攏有法度解決。 欠缺教材的問題，真好解決，其中一个辦法著是老師佮學生做伙制作雙語冊。Helot佇「兒童文學佇多語言課堂：促進多語言讀寫學習」這篇文章，講著雙語冊的好處：「雙語囡仔冊，一方面共雙語囡仔包容入來課堂上，支持in个家庭語言，另外一方面，嘛予幹焦講一款語言的學生，會當有機會接受差異的挑戰；同時，遮的雙語冊予老師一個挑戰種族中心主義的機會，克服面對in毋捌的語言的驚惶。」 佇遮，阮簡單報告佇排灣族地區國小制作雙語冊的經驗。阮的研究問題真簡單：「當老師袂曉學生家庭語言的時陣，in敢有法度佇學校推sak囡仔家庭社區的語言文化？」當然，阮認為有法度，阮攏毋捌排灣族語，所以阮揣會曉族語的社區人士來鬥相共，囡仔，老師佮社區人士做伙，制作排灣族佮華語對照的雙語繪本。透過協同教學，結合學校佮社區，阮予社區的語言文化成做學校課程中的「智識基金」，予囡仔感受著學校重視囡仔的族群語言文化。這个計畫顯示，雙語冊會當hoāⁿ過語言差異，成做無仝語言文化的橋樑。 雙語冊的應用有介濟。阮用雙語冊的方法，佇國小進行「在地為本」的讀寫教育。有的佇國小教囡仔，用七字仔寫台東的光景，有的結合藝術佮讀寫，編寫排灣族的小米繪本；閣有的用排灣族故事，編做科學教育的繪本；嘛閣有融入資訊科技，利用線頂資源來翻譯，透過雙語翻譯來學語言異同；閣有運用批判教學法，予學生自編排灣族姓名的雙語冊，用Ada的創意閱讀法，進行瞭解、解說、批判佮社會行動。 國際的語言教育趨勢是以母語做中心，進行多語言的教育。思考的重點是欲按怎予多元背景的學生會當佇學校教育中，感受著族群語言文化受尊重，欲按怎透過語言互助的精神，進行有效率的多語言的學習佮使用。簡單講，著是語言資源佮語言人權觀。其中上主要的原則著是透過母語優先的原則，追求填加式的語言教育，著是母語佮其他語言攏得著生存佮發展，無需要為著學習其他的語言，犧牲母語；反倒轉，愛透過母語的基礎，進行多語言學習。