抗議語言歧視的感想

台灣理性辯論的公共領域實在真欠缺，特別是報紙干焦注意有刺激性的新聞，新聞背後的議題探討，真罕得看著。

蔣為文教授抗議歧視母語讀寫的事件，新聞界除了自由時報捌佇副刊刊登母語讀寫相關議題，伸的大概無甚物咧注意。講實在的媒體水準實在有夠低。看in訪問的"文學家"，大家講的話袂輸兄弟仝款，有的講若是我絕對罵比xx閣較歹聽，看in氣kah欲死，老實講，誠爽！

另外，我嘛真佩服蔣教授一個人會當予in遐濟人氣kah牙仔歪歪（用牙毋是齒，無了解的人，會當參考陳冠學的解說），看著按呢，仝款真爽。

毋過，我嘛看in袂起，因為蔣教授不止一擺請in辯論，in煞攏激恬恬，無彼个勇氣接收理性辯論，干焦覕佇新聞媒體後壁，佇遐喝講好膽你著過來，我一定罵比伊閣較歹聽一百萬倍，這著是我看袂起in的原因。