施俊州e博士論文:語言、體制、象徵暴力：前運動期台語文學kap華語文學關係研究

俊州兄最近完整伊e博士論文：

論文名稱(中文) 語言、體制、象徵暴力：前運動期台語文學kap華語文學關係研究
論文名稱(英文) Symbolic Power via Linguistic Institutions: A Study of Pre-movement Relations between Taiwanese Literature and Chinese Literature in Postwar Taiwan

http://etds.lib.ncku.edu.tw/etdservice/view_metadata?etdun=U0026-2407201001013600&from=DEPT&deptid=D0026001005

我感覺伊e論文寫了真好。伊有運用社會學e理論來分析咱e台語文學發展。
Che真罕見，我看真che文學研究引用理論e部份，攏無容易瞭解，我讀無，ma懷疑作者kam
知影家己teh講啥。看俊州兄e文章，就無這個問題。閣卡重要e是chia e 論述攏是用台語寫e。
我看有越來越che碩士、博士論文是用台語寫e，實在真歡喜。這擺我ma有兩個學生用台語寫論文。
台語學術語言ê建立應該是真值得肯定ê發展。

前幾工Tada有來台東chhoē我開講，伊有問我對台語文發展ê想法。
我主要用香港作例，來講台語會當ǹg大眾化, 商業化ê路來行。
講台語ê人chiah chē 欲建立台語市場應該真簡單。
香港，韓國佮日本攏有共in ê文化外銷到台灣。
台語實在嘛愛好好仔共推sak作經濟資本。
台語是好生理，毋過chia ê生理人是按怎無咧注意這個市場咧?

昨昏有三个學生通過論文口試

我歇熱愛教台灣語文教育的碩士班，對7月初到今無啥歇睏。
這個歇熱我指導的學生有4个通過口試,昨昏有3个通過。
居中1篇是寫家長對母語佮華語雙語現象佮雙語教育个態度。
研究ê結果顯示家長對雙語現象佮雙語教育閣算支持。
總是母語佇家庭流失ê整形猶是kài嚴重。

我最近指導个論文有三篇是佮雙語繪本有關係。
昨昏口試个時陣，有討論著繪本/picture book愛按怎翻譯才好ê問題。
有尪仔冊,嘛有圖畫冊ê講法，毋知佗一個卡好勢?

我這擺ê國科會計畫嘛是teh寫雙語冊。
我這個歇熱除了教冊看ê冊主要是結合社區,家庭佮學校ê讀寫教育。
我嘛咧思考所謂ê本土化對細漢囡仔ê教育來講是毋是愛用社區教育
抑是地方為本(local-based)ê教育卡妥當?
這擺三本碩士論文攏有達到在地化ê要求，總是故事性卡無。
我閣來ê計畫希望會當有真濟故事。我希望會當予學生,家長佮老師做伙來寫in ê故事。
可能透過工作坊(hong)ê方式進行。另外卡主題性ê物件著beh予學生來參與。

鄭良偉教授最近有寫批來講提早讀寫ê教育計畫，我感覺這个構想真chán。
我感覺囡仔真愛讀佮寫，毋過學校ê課本傷過無聊,學生真需要補充ê讀物。
我頂工去原住民委員會共欲去紐西籣參觀ê人演講，我著予in看我頂擺佇
紐西籣奧克蘭大學圖書館翕ê毛利語ê冊ê相片。chia ê冊除了有予囡仔讀ê圖畫冊以外,
閣有國小ê教科書攏是用毛利語寫ê，我嘛共in講毛利語ê囡仔冊佮hō͘青少年看ê冊應該嬴過
台語,雖然in才50萬人，咱Hô-ló人1800萬以上。