有一個會員啊

今仔日去共阮囝同學ê媽媽買紅豆餅，順紲共講我11月欲佇學校推sak雙語冊ê活動。伊聽了真歡喜，講伊嘛欲加入雙語冊ê制作團隊。In先生是Amis，聽伊講in尪介gâu講Amis ê話，按呢我嘛會當共雙語冊翻作Amis ê 話。我按算這禮拜共欲去學校推sak雙語冊ê計畫寫出來，袂當閣拖啊。我定定一直看冊，結果詳細ê行動計畫攏猶未寫煞，最近看ê冊成有意思，總是若無變作行動，嘛是無效。明仔載佮後日有時間愛緊來寫。

香港ê閱讀教育

香港ê語文教育作kah不止仔成功，國際ê閱讀測驗捌著過世界第二名。最近這幾年嘛攏嬴過台灣。台灣ê閱讀能力毋但輸香港，嘛輸日本佮韓國。進前反對母語教育ê人攏牽拖教母語予華語教學ê時間變少，所以華語教袂好勢，閣有古文派ê teh嫌古文教了傷少，in閣組一個搶救國文ê運動。講起來嘛真奇怪，逐擺聽著台灣閱讀能力輸人忝忝ê時陣，in攏激恬恬，毋敢負責。

我今仔日看天下雜誌去香港採訪ê紀錄片"香港閱讀現場"。我teh看ê時陣khah注意ê毋是用啥物策略來教閱讀，顛倒是香港國小ê教學語言是in ê 母語，廣東話。這個紀錄片囡仔佇學校攏是講廣東話，雖然看ê是華語。毋過結果是按呢:

佇香港用母語(廣東話)教華語閱讀嬴過台灣用華語教華語閱讀!

講母語妨礙華語學習ê人應該愛看香港ê例，嘛應該看芬蘭這個世界閱讀第一名ê國家，in嘛是用母語teh教。

咱愛閣進一步思考以下幾个問題:

母語當作教學語言，無母語書面語:

Q1: 佇台灣若用母語(台語,客話, 原住民語...)來教華語閱讀是毋是會嬴過用華語教華語閱讀?

母語當作教學語言，閣有母語書面語:

Q2: 佇台灣若用母語(台語,客話, 原住民語...)來教母語閱讀(用母語ê書面語)是毋是會嬴過用華語教華語閱讀?

我相信咱若實行雙語教育共母語當作教學語言佮教學ê書面語效果應該嬴過干單使用華語作教學語言以及唯一ê書面語。若有人問你用母語教華語若有可能嬴過用華語，你應該知影欲按怎回答啊。咱若閣正實發展完全ê母語教育，咱嘛會當大聲講母語讀寫嬴過華語讀寫。

翻譯:Cesar Chavez 凱薩查維斯

今仔日拜六來學校準備社區讀寫个空課。看Ada个冊:Gathering the sun: An alphabet in Spanish and English(收成日頭：西班牙語和英語的字母書)。我已經對A翻到K啊。以下是其中一首詩:

Cesar Chavez 凱薩查維斯

你ê跤跡無閣再行過醬le̍h-le̍h ê làm土
過去，佇chia會當聽著你若霆雷公ê聲音佇hia閃閃熠熠
毋過你建立ê典範
Kah你所留落來的話語
恬靜ê希望，親像幼苗仝款
佇田裡發(puh)出新芽ê。

我上網去查資料，以下是相關ê資料:
http://www.americancorner.org.tw/americasLibrary/category/page/aa/activists/chavez.htm

"凱薩查維斯 (Cesar Chavez) 是一位墨西哥裔美國勞工運動者，也是聯合農場工人聯盟的領袖。二十世紀時，他是農場季節工人(migrant farm workers：為找工作四處遷徙的人)的主要發聲人。他堅忍的領導能力讓全國人民注意到勞工的工作環境有多糟糕，最後，他們的工作環境終於因此而獲得改善。
Cesar Chavez was a Mexican American labor activist and leader of the United Farm Workers. During the 20th century he was a leading voice for migrant farm workers (people who move from place to place in order to find work). His tireless leadership focused national attention on these laborers' terrible working conditions, which eventually led to improvements."

99年客語返鄉運動計畫開始進行

這幾年來屏東縣政府ê客家委員會作袂少chiâⁿ有創意ê母語活動。前鏨仔是咧推展客語幼稚園，有編教材嘛有實驗教學。最近in閣咧進行99年客語返鄉運動計畫。我真歡喜in咧作客家庄ê客語推展空課。In這禮拜beh辦99年客語返鄉運動ê研習會，我嘛有受邀請去講beh按怎作語言推廣ê記錄kah分析。我這2工用beh 8點鐘ê時間設計問卷kah作簡報檔案。我煞落來嘛想beh閣作一个網站來推展這件代誌。我感覺用社區建立語言，閣用語言建立社區是真要緊个代誌。我想官方个語言領土原則真僫達成，若會當用民間草根个力量來起造母語社區，建立母語个通天塔，母語保存才有可能。

siā-khu ê thak-siá kè-oē社區ê讀寫計畫

今仔日去參加囡仔學校ê家長會，hông選作副會長。我有kā家長委員講我想beh佇學校推展雙語冊ê閱讀kah寫作。逐家攏真支持，嘛有人提議講踮社區來辦讀寫ê課程。按呢嘛真好,我chit-má想著ê主題是:"讀寫咱ê社區"。抵好這學期有咧教寫作ê課,嘛是用社區作主題,我最近mǎ咧看社區本位教育kah寫作方面ê冊，看規哺仔，chit-má應該來實踐。我最近嘛定定共學生講批判讀寫主張"讀寫語詞"著是"讀寫世界"。我想這擺閣會當順soah來推展多種語言ê讀寫。阮這個社區嘛有真濟無仝ê族群,應該會當揣出濟濟ê社區智識基金。

我後禮拜愛開始好好仔規畫這件代誌。愛準備社區讀寫ê計畫書:
1.列出時間/地點;
2.開始訓練工作人員;
3.編寫教材;
4.寫報名表,廣告單;
5.揣相關ê繪本作例;
6.kah學校討論時間。

我看10月中愛共這個計畫書寫出來，11月開始進行推展計畫。