香港ê閱讀教育

香港ê語文教育作kah不止仔成功，國際ê閱讀測驗捌著過世界第二名。最近這幾年嘛攏嬴過台灣。台灣ê閱讀能力毋但輸香港，嘛輸日本佮韓國。進前反對母語教育ê人攏牽拖教母語予華語教學ê時間變少，所以華語教袂好勢，閣有古文派ê teh嫌古文教了傷少，in閣組一個搶救國文ê運動。講起來嘛真奇怪，逐擺聽著台灣閱讀能力輸人忝忝ê時陣，in攏激恬恬，毋敢負責。

我今仔日看天下雜誌去香港採訪ê紀錄片"香港閱讀現場"。我teh看ê時陣khah注意ê毋是用啥物策略來教閱讀，顛倒是香港國小ê教學語言是in ê 母語，廣東話。這個紀錄片囡仔佇學校攏是講廣東話，雖然看ê是華語。毋過結果是按呢:

佇香港用母語(廣東話)教華語閱讀嬴過台灣用華語教華語閱讀!

講母語妨礙華語學習ê人應該愛看香港ê例，嘛應該看芬蘭這個世界閱讀第一名ê國家，in嘛是用母語teh教。

咱愛閣進一步思考以下幾个問題:

母語當作教學語言，無母語書面語:

Q1: 佇台灣若用母語(台語,客話, 原住民語...)來教華語閱讀是毋是會嬴過用華語教華語閱讀?

母語當作教學語言，閣有母語書面語:

Q2: 佇台灣若用母語(台語,客話, 原住民語...)來教母語閱讀(用母語ê書面語)是毋是會嬴過用華語教華語閱讀?

我相信咱若實行雙語教育共母語當作教學語言佮教學ê書面語效果應該嬴過干單使用華語作教學語言以及唯一ê書面語。若有人問你用母語教華語若有可能嬴過用華語，你應該知影欲按怎回答啊。咱若閣正實發展完全ê母語教育，咱嘛會當大聲講母語讀寫嬴過華語讀寫。