咱tō趕緊來開拓大學國家語言授課ê空間

2019年公告ê「國家語言發展法」賦予台灣各族群語言「國家語言」地位，該法第九條規定「學校教育得使用各國家語言為之」。也tō是講，本土語言成做教學語言已經有法律基礎。因應國家語言發展法，教育部tī國小、國中kah高中攏有本土語言課程，嘛有「沉浸式教學」ê推廣工作。可惜，獨缺高等教育ê國家語言推廣，雙語國家政策ê雙語嘛無包括「國家語言」，kan-ta有英語授課ê EMI，無台語授課ê TMI。大學本身嘛真罕得有積極鼓勵用國家語言授課ê例。 國家語言授課有語言解放、語言智識化和現代化ê意義。何大安院士主張「語域共享」ê概念，認為有必要「替受壓迫ê語言爭取語域、創新語域，予所有ê語言攏會當tī完整ê語域中自由生長、自由創造……還予遮ê語言所被剝奪ê語域，親像教育、醫療、法律、政治、宗教、藝術等等，予受捆縛ê語言活力閣活。」世界上有袂少語言面臨滅絕ê危機，無發展做智識ê語言，綴袂著現代化ê跤步攏是可能ê原因。國家語言若tī大學做教學語言，m̄-nā會當提升本土語言地位kah功能，閣會當促進本土語言智識化kah現代化ê發展。 大學教師tī課堂ê本土語言授課實踐上蓋關鍵。畢竟徒法不足以自行，大學教師成做課堂語言政策ê規劃者kah執行者，會當透過tī課堂解釋、協商本土語言授課ê意義kah具體ê實踐，著會當開闢本土語言ê「意識形態kah執行」空間。舉幾个仔例：台灣大學周婉窈教授bat用台語錄製「Lán ê 島嶼．lán ê 歷史」節目，嘛tī大學用台語教授「近代台灣ê歷程」ê課程。台灣師範大學黃浩霆教授，來自香港，用台語開設「基礎商業資料視覺化kah溝通」課程，同一門課選擇台語授課ê學生比英語授課較濟。成功大學蔡美慧教授開設「講台語看英語認捌世界ê故事」ê通識課。以上ê例顯示，台語授課有可行性。。 過去台灣語言tī教育過程中受壓制，本土語言hông看無，致使語言流失，taⁿ本土語言得著國家語言kah授課語言ê地位，但是m̄-koh大學國家語言授課，猶未時行。高等教育ê國家語言推廣閣較拍拚咧，教育當局需要明確ê宣示支持國家語言授課，提出大學國家語言授課政策，進行相關ê授課培訓、開發教材kah建立獎賞制度，拆除kā國家語言阻絕阻擋tī大學課堂之外ê單語意識形態高牆。同時，大學教師嘛需要發揮主體性，盡心盡力規劃kah實踐國家語言授課政策，建立大學國家語言授課ê意識形態kah實施空間。