咱著趕緊來開拓大學國家語言教冊的空間（漢字版）

2023.01.31 21:21 張學謙 https://www.taiwantimes.com.tw/app-container/app-content/new/new-content-detail?blogId=blog-04d144ea-8283-42a8-b6c2-98ac737700f5 你敢知影本土語言佇「國家語言發展法」通過了後，已經有「國家語言」的地位，同時嘛會當做教學語言？為著落實國家語言發展法，教育部佇國小、國中及高中將本土語文列做部定必修課程，嘛有浸水式教學的推廣工作。可惜，猶閣欠大學的國家語言推廣。講起來嘛奇怪，現此時的雙語政策有華語及英語，毋過無「國家語言」，致使高等教育干焦有英語教課的EMI，國家語言的教學語言地位干焦是空喙哺舌咧。 為啥物咱愛用本土語言佇大學教冊？按呢有啥物意義？除了有雙語教育的各種好處，親像支持多元文化、多語學習、認知靈活、社會正義等等。特別需要強調伊對語言公平、語言智識化和現代化的意義。台灣語言佇高等教育予人看無是語言無公平的結果。中央研究院何大安院士主張用「語域共享」的概念，來追求語言的公平正義，伊講咱有必要「替受壓迫的語言爭取語域、創新語域，予所有的語言攏會當 佇 完整的語域中自由生長、自由創造……予受捆縛的語言活力閣活。」世界上有袂少語言面臨滅絕的危機，無發展做智識的語言，綴袂著現代化的跤步攏是可能的原因。國家語言若佇大學成做教學語言，不但會當提升本土語言地位及功能，閣會當促進本土語言智識化及現代化的發展。 有人講本土語言教冊真好，不過，敢有法度用母語教大學的課程？這著需要大學教師成做課堂語言政策的規劃者及執行者，透過課堂解說、協商本土語言教課的意義及具體的實踐，起造大學課堂母語教學的空間。目前已經有寡教師佇大學用母語傳授智識，做掖種的工課。舉幾個例：台灣大學周婉窈教授捌用台語錄台灣歷史的廣播節目，嘛佇大學用台語教「近代台灣的歷程」課程。台灣師範大學黃浩霆教授，伊對香港來的 ，用台語開設「基礎商業資料視覺化及溝通」課程，仝一門課選擇台語教課的學生比英語教課較濟。成功大學蔡美慧教授開設「講台語看英語認捌世界的故事」通識課。以上的例顯示，台語教冊是紡會行的。可惜，目前大學國家語言教冊的課程比率可能無到萬分之一。 「學會曉華語、失去母語」是台灣人共同的教育經驗，印證語言復興學者所講的：「教育是語言使用極為關鍵的領域……當學校教育干焦以國語進行，地方語言必然衰微。」大學的本土語言教冊有伊的必要性及可行性，若無實際去實踐，國家語言的教學語言地位著只是一張白紙。教育當局需要明確宣示支持用國家語言教課的政策，提出大學國家語言教課的規劃，進行教課培訓、開發教材及建立獎賞制度，拆除共國家語言擋佇大學課堂外口的單語意識形態高牆。閣較有公平合理的語言政策猶原需要日常課堂的實踐行動才有價值，大學教師需要發揮主體性，盡心盡力規劃及實踐國家語言教課政策，建立大學國家語言教冊的意識形態及實施空間。