研討會講著呂興昌的＜請你做伙來救助＞

我châng 佇研討會咧報告台語行銷的時陣有引用呂興昌教授的詩，＜請你做伙來救助＞:

『人講珍貴 e5 動物 ai3 保護/稀罕e5植物 ai3 照顧/不管是來做人客e5 la7-poe ti7 七股/或是水筆仔落地生根四草湖/鳥仔ai3保護樹仔 ai3 照顧/老師大聲呼，學生不敢激 khou3- khou3/人 kap 自然做伙來喘氣/台灣 e5 未來 chiah 會有前途/可惜台灣目睭 hou7 中國螺仔肉糊/台灣嘴舌 hou7 中國病毒 tou3/強 beh 絕種 e5 母語/父母 tiN3-恬恬，/囡仔笑嘻嘻講伊【還是活得很快活】/老師 chhin3-chai2 教，學生加減度/英語 sia3-sia3 叫，中國話極 chhio-tio5/台灣話大嘴開開土土土/氣死阿公阿媽變無步 /樹仔 ai3 照顧/鳥仔 ai3 保護/強 beh 絕種 e5 母語/請你做伙來救助/ 』

內底有寡話khah敏感，尾仔著有人講宣傳的時若講chia的話恐驚會有反效果。這個評論實在趣味，對我來講，行銷的目的是欲予人有機會通好重新思考家庭語言的態度佮習慣，講好聽話，是khah bē得失人，毋過著失去批判，反省的機會。我聽的時陣其實是咧想Skutnabb-Kangas閣較直接閣歹聽，毋過成有道理的話:"學校常在是母語的屠殺場，佇hia 咧教冊的，嘛定定是母語殺手。" 我想行銷的方法猶閣無夠，教育內底愛有閣較濟的批判語言意識教育，才有法度共一寡錯誤的觀念去除(un-learn)，重新學習(re-learn)符合正義/公平/人性的語言意識。