3.2 學校對母語教育應有的態度佮作為

張學謙

學校佇母語教學上扮演真重要的角色。學校的母語課程毋但是母語溝通能力佮族群文化的傳授，同時嘛傳遞學校對母語的態度。所以，Cantoni(1997)佇＜維持少數語言生機是學校的責任＞文章中，並無直接討論原住民語言教學本身，煞共焦點囥佇檢視學校造成學生語言文化，被邊緣化的因素佮解決的方法。學校當然需要去除（un-learn）鄙視母語的意識形態。欲按怎做咧？Cantoni（1997）建議學校採取以下的行動：傳播訊息、改變態度、持續的行動。

3.2.1 訊息傳播：母語是資源佮權利

佇訊息傳播方面，特別需要拍破母語是學習障礙的迷思。學校定定將母語當作是學習的阻礙，譬如講：多語言學習阻礙兒童發展、造成認知混淆。許多家長因為考慮學校課業，定定著放棄母語，造成家庭語言流失。結果剝奪學生對雙語現象得著認知優勢的機會。

Cantoni（1997：2-3）特別強調雙語現象佇認知上的優勢（cognitive of bilingualism）。學術研究毋但支持雙語的認知優勢，嘛清楚的表明雙語對兒童的教育發展有正面的效果（Cummins 2001；Skutnabb-Kangas 2000)。Cantoni（1997）認為無需要煩惱教母語會影響學校強勢語言的發展，因為濟濟的研究證據攏顯示母語對第二語言有正面的助益。Cummins（2001）ka7雙語現象佮雙語教育的好處講佮真清楚，伊的論點會當歸納如下：

1學校提倡母語對母語佮強勢語言的發展攏有幫助。這是因為：a）雙語予兒童佇語言上得著優勢；b）兩種語言互相牽成。
1. 學校開佇少數民族語言教學的時間，並袂妨礙兒童透過學校強勢語言進行的學業發展。實施良好的雙語課程會當促進弱勢語言的讀寫佮學科智識，袂對兒童強勢語言的發展，有任何負面的影響。
2. 兒童母語發展的程度是預測in第二語言發展的重要指標。有穩固的母語基礎的囡仔，會當發展出較好的學校語言的讀寫能力。
3. 兒童用母語學習，毋若學著語言，koh學著概念佮智識技能，遮攏會當轉移到強勢語言。
1990年鄭良偉佇《演變中的臺灣社會語文：多語社會及雙語教育》就bat針對臺灣實施雙語教育的效果，提出詳細的說明（鄭良偉 1990：24-25； 146-7）：

1. 母語能力會當保留，華語佮外語能力攏會當提升；
2. 有理性、智慧的判斷，用自信佮開放的態度面對文化差異；
3. 愛護家己的語文、也尊重被人的語文；
4. 充分運用雙語能力，互相尊重彼此的語言，促進瞭解、容忍、和諧；
5. 囝仔透過母語繼續佇智力、情感、人際上發展，有尊嚴、有自信，心理健康；多種語言增廣見識、發展生活技能、擴展人際關係，發揮个人潛能；
6. 家庭親子、祖孫溝通會好勢，世細瞭解長輩的教示、吸收經驗、智識，長輩有尊嚴，囝孫有孝；
7. 頂下代溝通無障礙，父母話溝通上自然、好勢，親切koh甘心；
8. 透過雙語傳承文化傳統、民族智慧，有效率koh有深度；
9. 對所屬大、細的團體有正確的認同，成做團體中會行動、有關愛的成員。

以上關於雙語現象佮雙語教育的訊息毋但教育人員愛清楚，嘛愛提供予家長作參考。

uì社會語言學的角度嘛會當說明多種語言存在的必要。Cantoni (1997)就以譬喻的方式說明語言多樣的必要性，伊共多種語言譬喻作衫仔櫥，因為無仝場合有無仝穿插的必要，所以咱真罕得去到佗位攏穿仝一領衫。咱嘛袂因為歇熱，著共寒人的衫tàn hiat-ka̍k。咱的衫仔櫥愛有濟種的款式佮變化，才有法度應付無仝場合穿插的需要，語言嘛仝款，無仝的語言會當予咱佇無仝的場合 佮無仝的對象有適當的選擇。

需要宣傳會曉多種語言的好處。可比講：會曉多種語言會當開闊咱的人際關係，生理人會當作愈濟生理，會曉濟種語言的學生，毋但會加較巧，未來嘛較有出路。會當透過語言行銷的手法來宣傳遮的優點。[1]事實上，毋但學校需要行銷母語，每一个人攏會當佇日常生活中擔任母語推銷員，毋但愛鼓吹母語的必要性佮優點，嘛愛積極的破除單一語言的神話，為多種語言、多元文化辯護，為挽救母語流失，促進台灣族群語言重生打拼。

3.2.2 改變態度：學校對母語應有的態度

語言就是文化，語言就是認同。當學校對囝仔無友善，無欲承認囝仔的母語，就是拒絕囝仔，按呢做就若親像叫囝仔共家庭的語言、文化留佇校門口，兒童被剝奪eh，毋但是母語教育的權利，閣失去自我認同，感覺無受著學校接納，嘛會失去自信（Cummins 2001）。

佇態度改變方面，學校必須uì看袂起母語轉做珍惜母語。學校定定內化看袂起母語的意識形態。母語透過污名化的過程，hông看作是阻礙、缺陷，是予人看袂起的後段班語言；國語hông美化作唯一有價值的語言資源，是前段班的語言（張學謙 2008; Skutnabb-Kangas 2000）。佇這種看袂起母語的環境下，語言教育的結果定定是減少式的，語言教育的結果是學習華語，失去母語。學校愛疼惜囡仔的母語，共當作是囡仔紮去學校的語言文化資源，是學校教育、課堂教學愛注重的「智識基金」（funds of knowledge，Moll et al. 1992）。

保存原住民語言研討會bat對學校教育工作者應當有的態度，提出下面的建議(Cantoni 1997)[2]：

1. 教育工作者愛尊重、欣賞學生家長的文化；
2. 教育工作者無應該批評佇學校使用母語的人；
3. 袂使因為有人聽無母語，就阻止使用母語；
4. 無應該接受抑是傳遞華語抑是英語比本土語言koh khah好的講法；
5. 教育者（包括校長）攏愛學一寡仔學生的家庭語言；就算講袂好勢，按呢嘛表示教育者對家庭語言的尊重佮興趣；
6. 教育者雖然無法度為母語的世代傳承負所有的責任，in會當大力鼓吹對家庭母語的正面態度。

總講一句，學校對母語的態度應該愛對母語是問題，轉向母語是資源、母語是權利的方向。

Cummins（2001）講了真著：「兒童家庭的語言佮文化經驗是in將來學習的基礎，學校的教育愛佇遮拍基礎，毋是去破壞這的基礎；佇學校，· children's cultural and linguistic experience in the home is the foundation of their future learning and we must build on that foundation rather than undermine it;· every child has the right to have their talents recognized and promoted within the school.每一个兒童in 的才智攏有得著尊重佮發揮的權利。」學校若有這款正確的態度，就會當促進少數語言保存佮世代傳承，袂閣成作造成母語流失的主要機構之一。

3.2.3 持續的行動

佇具體行動方面，學校會當先對tih起造母語友善的校園環境做起，營造支持語言多樣性的氣氛。學校會當建立族群語言的語言景觀，母語會凍使用佇各種場合，親像教室的布置、學校的公告、建築的名稱、宣導海報等等。佇學校的環境創造族群的語言文化景觀，會凍予.學生感受著語言的自主權、提升學生的族群意識、增加對多元文化的尊重佮幫贊母語的延續（張學謙 2004）。

另外，教師嘛會當透過課程傳遞肯定母語的訊息，予學生瞭解雙語現象是重要的語言、文化佮智識資源。Cummins（2001）就建議教師會當進行以發展兒童語言意識為目標的課堂計畫，可比講透過調查、頌揚學生的多語言現象；抑是佇課堂上進行語言分享的活動，親像講，每日一詞的活動，逐工由一位同學佇課堂中介紹一个母語詞彙，全班作伙學習佮討論這个詞彙。遮的活動，一般的老師佇平常上課的時就會當進行，毋是干但佇母語課、抑是母語老師才需要推行母語。相關的活動會當安排佇每禮拜的臺灣母語日進行。

佮真實生活連結是母語習得的關鍵，特別愛強化家庭佮學校的連結。Cantoni (1997：7)講了真有道理：「欲維持母語生存，干但疼惜猶無夠，重要的是使用母語。」學校除了應當愛對母語友善，閣需要創造實際使用母語的機會。學校母語教育通常無法度復興母語，主要的原因著是母語干但是一門學科，無用佇真實的社會情境。Fishman（2001）強調學校母語教育袂當干但孤立佇學校進行，愛共伊連接到校外、放學了後，抑就是，去學校讀冊進前、佇學校期間、放學了後，攏愛佮真實生活做連結。

Cantoni (1996)建議教師以跨課程的語言整合方式，共母語融入課程，嘛主張教師透過行動研究進行母語教學的改善。張學謙（2004）運用統整的觀念，整理出幾種共母語融入學科教學的方式，包括：內容為主的教學；主題為主的教學；體驗式的學習；方案為主的教學；家長參與兒童的母語教育；任務為主的教學以及對比分析法。因為家庭是兒童語言社會化的關鍵，後一節集中焦點說明幾種結合家庭佮學校母語教學的方法。

[1] 運用語言行銷的手法宣傳母語會當參考張學謙et al.（2005）以及社區母語資源中心網站：http://www1.nttu.edu.tw/tws/
[2] 為著適應臺灣的狀況，改寫部份ê語詞。