祝老師八十歲生日快樂！鄭良偉教授對台灣語言運動ê貢獻

張學謙

鄭良偉教授對台語文ê發展有全方位ê貢獻。長久以內，伊毋但對台語作深入ê探討，提升台語文ê學術地位，同時mā積極投入台語文運動，爭取母語教育權，促進台語文ê實踐。鄭教授佇學術方面ê貢獻，逐家攏知，佇遮我想欲分作5點來講鄭教授對台灣語言運動ê貢獻：

1. 添加式ê雙語教育觀：鄭教授認為語言學習應該以母語做基礎，透過母語去學習其他ê語言，語言是互相牽成ê關係。伊主張ê多語社會佮雙語教育，成做台灣語言運動ê重要基礎，拍破官方單語ê語言歧視主義，行向添加式ê雙語現象。

2. 學術ê普及化：鄭教授的學問真飽，毋過佮一般學者無仝ê所在是伊將研究ê結果，作進一步ê教育佮社會實踐。伊透過寫冊、演講、寫文章來宣傳雙語、雙文ê理想，真濟人對伊ê文章佮演講，認捌母語ê多元價值，得著願意為母語犧牲奉獻ê氣力。

3. 實踐ê精神：鄭教授強調社會關懷，主張毋通干單做研究，嘛愛透過行動，實踐信念。伊家己著是真好ê模範，伊組織草根性ê台文讀寫班、培育母語師資、鼓吹制定官方多語政策佮雙語教育...

4. 堅強ê母語意識：鄭教授通講是母語戰士，對看無起母語ê人，伊是絕對無容允ê (zero tolerance)，伊定定批評學者抑是作家無欲寫母語，定定予遐ê長期穿「國王新衫」ê人，擋袂牢，氣怫怫。

5. 科技整合佮團體合作：鄭教授真重視科技佮學科ê整合。伊發明台語輸入法，起造台語語料庫，發展計算語言學ê工具，予台語ê研究佮教學會當綴著世界ê潮流。伊強調合作ê精神，整合各方面ê人才，做夥起造台語美麗ê新世界。

鄭教授是台灣語言運動ê典範。伊疼痛母語ê精神佮為母語拍拚ê實踐，值得咱學習。佇遮恭祝鄭教授身體健康、食百二。