Ui語言花園談語言多樣性e重要

我真合意Garcia(1992）語言花園ê比喻。伊用這個比喻來強調語言多樣性ê重要。伊認為世界各地有無kâng形狀、各色各樣ê花朵。無kâng色ê花朵為花園增添艷麗，豐富咱ê視覺kah美感經驗。這款ê人生才是彩色ê；假使咱ê花園ê語言花蕊，kan-ta一種，人生就變烏白ê。

真可惜，多種語言的聲音傷細，ti社會上定定聽著beh消滅多種語言的各種藉口，親像講母語教育是政治意識形態的、是teh去中國化、是增加囝仔學習負擔.....這款kan-ta一種語言著好的講法，其實對人類有真大的危害。

對語言生態（ecology of language) ê觀點出發，語言ê多樣性是資源，m̄是問題。Crystal(2001）提出咱需要關心語言死亡ê理由，第一個理由就是﹕『因為咱需要多樣ê語言』。伊對語言生態學ê角度論證多樣性ê重要性﹕「演化全靠基因多樣」愈來愈齊一ê現象，對物種ê存活，長期來講，是有危險ê。用生態學ê話來講，就是：siōng多樣ê生態系，就是siōng健康ê生態系。』伊認為咱人有法度持續ê生存發展，是因為咱有能力發展出多樣ê文化，來適應各種ê環境。所以，伊講﹕「語言ê多樣性若有減損，咱物種ê適應力馬上降低，因為，nā án-ne,咱ē-tàng吸收ê智識庫，水位就下降啊。」