成立國家語言規劃中心 提升本土語言計劃

成立國家語言規劃中心 提升本土語言計劃

張學謙

台灣到今猶無一套完整e5語言政策，特別是對華語以外e5台灣語言(下面簡稱作LOTM) e5地位規劃、本體規劃kah學習規劃。雖然講kah過去比較起來，規e5個語言政策是有往多元開放即e5方向來行，毋過因為對專門語言規劃組織kah適當規劃方法e5欠缺，LOTM e5地位規劃、語文規劃kah學習規劃並無得著適當e5照顧。

Ti這篇文章內面我beh來討論國家語言政策組織e5功能kah定位，soah落來討論台灣語言e5地位規劃。

成立國家語言規劃中心

現此時負責台灣語言政策規劃e5單位主要是教育部“國語推行委員會”。chit個組織因為有專業、經費kah結構e5限制，並無法度處理台灣多種語言e5規劃，應當愛liong7早改制，成立國家級e5語言規劃中心，chit個中心會使處理LOTM、台灣華語、社區語言kah外語e5相關語言規劃。chit個組織會使參考e5名稱﹕1)台灣國家語言發展中心；2)台灣國家語言規劃研究院（中心）；3)台灣國家語言建設研究院（中心）。

chit個組織e5任務，就是根據台灣社會語言e5現狀kah未來發展e5趨勢，參考世界多語言國家e5規劃經驗kah語言規劃理論，為著台灣語言佇地位、語文kah學習規劃作出適當e5安排。咱會使得ka7 chit個組織定位做﹕
l 制訂國家語言政策；
l 制定LOTM語言復振計劃；
l 定法律予伊有正式e5地位，可比講佇1987年e5時，毛利語言法案規定成立毛利語言委員會；1993年威爾斯語言法案成立威爾斯語言委員會；
l 逐種族群e5語言攏會使定做國家e5語言抑是官方e5語言，會當有平等e5語言權利。國家語言規劃機構有保存kah發展各種族群語言文化e5責任。國家語言規劃機構應該愛成立各族群語言地位規劃e5部門，語言文字規劃部kah語言學習規劃部。頭前講e5部門負責各種族群語言文化教育e5研究、發展kah推廣工課。

佮過去獨尊國語e5政策比較起來，chit個國家語言規劃中心佇功能方面有下面kui2點e5調整（張學謙，2000）﹕
l ui3獨尊華語e5語言歧視主義調整做尊重kah保障各種族群e5語言文化權；
l ui3謀殺本土語言文化調整做促進本土語言文化e5重生；
l ui3壓低（ke7）本土語言調整做提升本土語言e5地位；
l ui3限制本土語言e5發展調整做促進本土語言e5文字化，訊息化kah現代化；
l ui3無效率e5語言教學法調整做有效率e5語言教學法；
l ui3自卑無自信心轉變充滿著信心，佇語言教育過程中予伊有主張e5權力（empowerment）；
l ui3單語單文化轉變做多語言多文化e5世界趨勢；
l ui3單文字教育調整做多文字教育；
l ui3無根底e5本土語言教育調整做結合學校，家庭kah社區e5語言教育。

落實語言地位平等

台灣e5語言地位規劃主要是ui3語言同化轉向語言多元論，毋過猶無法治化。2003年國語推行委員會通過『語言平等法』，語言平等法草案明訂beh保障十四種國家語言e5語言權利。語言平等法e5制定大部份是根據客委會e5『語言公平法』閣做小可仔修改，『強調語言平等、語言支持、以及語言交流，特別是少數族群語言佇公共場所e5接近權，可比講國家必須愛提供媒體e5支持、公務人員e5語言能力、以及母語e5受教權。』（施正鋒 2004﹕172）。真可惜，hit個法案因為有在野黨反對soah袂當立法通過。雖然袂當有法律條文e5政策，毋過上少會當看出佇語言政策e5動機方面，台灣語言政策有tauh-tauh-a2行向語言同化轉向語言多元論。

毋過，佇政策猶未落實chin3前，地位上獨尊華語e5情形，iah是kah國民黨時期同款。欠制度化e5保障，對『多元文化主義』、『語言多元論』e5觀念會使講是「空喙哺舌」，對著現此時欲死欲死e5本土語言保存恐驚是無sim-mih幫助。佇制度性方面e5支持，福佬人（Holo人）到今猶無法度有親像原民會抑是客委會方面e5專屬族群機關，無hong5看做弱勢語言、嘛無看做是有相當人口實力e5普通話，伊e5地位實在真ngai7-giok8，予人hut袂清楚，有需要ka7伊e5功能kah地位來訂hou7清楚。關係著『台灣話』chit個名詞e5爭論，不時咧出現，官方應當愛有個適當e5規範。
Faingold（2004）分析187個國家e5憲法，得著“放手不管”（hands-off）kah“插手管理”（hands-on）chit兩種官方e5態度。台灣kah中國chit兩個國家tuh8-ho2分別屬於“放手不管”kah“插手管理”e5類型。佇憲法條文方面中國提供保護少數族群語言權利，而且有保護人民語言權利e5法規，台灣相關語言人權e5法規真欠缺（張學謙 2004）。根據中國e5憲法，民族區域自治法kah其他法規e5規定，中國少數民族語言文字e5基本原則，主要有下面kui2點（丘才廉 1994：48-49）：
1. 國家保障各民族攏有使用kah發展家己語言、文字e5自由。
2. 各民族公民攏有使用本族語言文字進行訴訟e5權利。
3. 民族自治地方e5選舉文件kah印仔攏愛同時使用當地通用e5民族文字。
4. 佇招收少數民族學生為主e5學校，會使用少數民族通用e5語言文字教學kah採取民族文字e5課本。
5. 教育kah鼓勵各民族e5幹部互相學習語言文字，對會曉使用兩種以上當地通用e5語言文字e5人，攏愛ka7獎勵。
6. 民族自治機關攏有使用民族語言文字e5自治權。
7. 商標袂使使用有民族歧視性e5文字kah圖形。

雖然中國e5人權記錄內面，實在有真濟無人權e5作法，毋過對語言人權e5法令保障，現現就比台灣進步。台灣政府需要愛閣較具體、積極e5作法，推動語言人權e5法制化。
欠缺工具性價值定定是弱勢族群放棄母語轉向強勢語言e5主要因素。對族群語言活力較低e5族群，較積極e5做法應該是愛盡力擴充母語佇各種場所e5使用，毋免因為自卑自我限制佇低階e5場所。愛超越雙語e5限制，母語欲進入公共場所，chit方面e5語言規劃通常愛由政府來進行。政府應該愛予族群語言官方e5地位，來提升族群語言e5語言活力，促進語言e5延續。對族群語言來講，官方e5地位是確保政府提供制度性支持e5保證。