白話字活力kah教會

作者 張學謙
刊ti 臺語信望愛
http://tailo.fhl.net/life/life33.html

1885年到1970年間e-tang講是白話字siong有活力e時期。Chit-e時期白話字，theng-ho講是「得tioh氣力」（empowerment）e文字，m-bat字人，透過伊真緊就學會曉父母話，thang好家己讀聖經，領受上帝e教示，得tioh信仰e氣力； ma e-tang對chia來得tioh教育e啟蒙，學算數來記賬，寫批聯絡感情，看教會公報來知影教會消息、世界大事，欣賞文學，讀白話字注解e漢文經典對漢文傳統有批判e了解， ma e-tang親像蔡培火kang款，行入社會啟蒙e工作，提升一般人e讀寫能力。白話字e功能m-na 有宗教e功能，有教育e功能、文學e功能、個人連絡感情e功能kah教會內部行政e功能。Chit-e時期白話字e活力表現ti文類、文獻、信仰、社會關懷、文學、教育、人口kah學習chit幾個層面。對語言保存e觀點來看，白話字留落來真重要e讀寫基礎建設，有辭典、教材、文獻kah會曉白話字e人才。

1970年以後，長老教會無親像早期教會hiah-nih phah拼推sak白話字。對歷史發展e觀點來看，長老教會對白話字e推sak e-tang講是「頭a興興、尾a冷冷」。咱有討論影響白話字發展e政治kah社會文化因素，語言文字e議題值得繼續探討，因為語言文字e選用是傳教一定會面對e問題。Ti台灣各族群母語流失，giong-beh完全徙對華語去。教會是beh toe 時勢行，放sak母語、改用華語，ah是beh堅持母語傳道、母語讀聖經e傳統，母語得tioh「重頭生koh活」e生機？

若是beh堅持母語傳統，白話字tioh e-tang扮演真重要e角色。白話字ti教會e使用有真重要e意義。因為語言e生存需要固定使用e領域，有文字koh-khah有法度幫助語言保存。猶太人e希伯來語有法度死--去koh活--tng來，重新chiaN做有生命力e語言，就是因為in有ti宗教領域使用母語、母語文。希伯來語ti二千冬前，就已經死--去，無koh是口語溝通e工具，m-koh到20世紀初，soah起死回生，重新chiaN做有生命力e語言，ti各種領域使用。書面語e存在kah使用是希伯來語重生e重要因素。希伯來語e口語消失beh二千goa冬，m-koh書面語傳統m-bat斷過，希伯來文一直使用ti宗教領域，像祈禱、讀聖經ham猶太法典（張學謙 2003）。張裕宏（2001﹕175；186）真強調白話字傳統e重要性，伊認為beh建立對台語e信心，「就愛hou台灣人知影咱e傳統，台灣人知影家己有久長e好傳統來感覺驕傲，」就目前來講，「白話字e文獻iau是上豐富，佔所有得會tioh e台語文獻e大部分，所以白話字iau是siong重要，是負責台語傳承e大樹身。」Chit種文化傳承kah文化資源觀點，是復興白話字活力真重要e理由。

Chit幾年來，長老教會lu來lu關心母語e保存kah發展。除了設立「台灣族群母語推行委員會」，人光出版社、教會公報社ma出「台文系列」，chit-ma已經出十幾本a。2005年人光出版社有出林俊育長老kah陳清俊長老合作翻寫漢羅版e《平民基督傳》（林俊育 2005），chit本冊650頁。林長老ti「代序」講：「台灣長老教會tui保存台語有不可否認e功勞，但he是咱前一代努力e成果，咱chit 代m-thang做台灣白話字e殺手。」Chit-e呼籲值得長老教會思考未來應當行e路。

一百tang後，教會歷史m知會an-choaN寫咱chit-e時代e文字傳道經過，是浪子chhoe無路thang tng 去，繼續流浪，ah是浪子回頭e故事leh?