逐家攏褪赤跤ê島嶼?

最近真無閒，頂禮拜閣目睭痛，煞真久無寫blog。Châng (7/23)胡長松先生來阮學校演講，伊講伊文學創作ê過程，為甚物欲寫小說佮伊寫小說ê理由，講kah真詳細嘛真精彩。趣味ê是伊所講ê kah我下早仔上雙語教育講ê有寡理念真仝款。我真歡喜有文學家來阮chia，分享伊ê人生觀kap伊ê理想。
胡先生有講著伊對華語寫作轉換到台語ê過程，有講著捌人bat共講按呢kám ē-hô?畢竟台語文ê市場卡細。彼時陣我雄雄想著進前讀行銷理論ê冊有看一個故事，講有一個賣鞋仔ê推銷員去一個小島做生理。想袂到這個小島除了伊以外無一個人chheng鞋仔，故事趣味ê所在佇chia，悲觀ê人，想beh khioh現成ê 人可能鼻仔摸leh，著走啊。卡樂觀ê人，卡有堅持ê人看著ê是這個目前逐家攏褪赤跤ê島嶼有真大"潛在"ê市場，愛好好仔拍拚。我想chit-má咧 開墾母語讀寫田園ê人，應該是chiâⁿ有眼光ê人，美麗島chit-má褪赤跤ê人無濟，毋過母語文盲that-tó-ke，有影是真有將來性!